Pitit Ginen
Joined: 26 May 2007
Posts: 356
Location: Canada
 |
 Posted: Mon Feb 23, 2015 2:29 pm Post subject: |
  |
|
Sou kesyon enpòtan sa-a, ROODY DELPE, se sèl moun ki bann yon repons ki sanble moun k ap analize, ka p reflechi. Misye bay yon bannn rezon epi li eksplike pou kisa li avanse agiman sa yo. Misye pote yon rezònman ki solid ki chita sou yon lojik djanm. Se kapasite pou w analize sa-a, sa vle di pou w montre koneksyon ki genyen ant yon pakèt eleman, se kapasite sa-a ki fè diferans ant 2 oswa plizyè moun k ap pale. Roody fè sans anpil. Sitou k el eksplike w pou kisa ansyèn jenerasyon an te gen anpil siksè.
Pandan ke Roody fè anpil sans, youn nan bagay ki obligatwa lè n’ap konpare, sèke nou gen yon travay an plis pou n fè. Mwen paka ap konpare siksè Mizisyen Miyami ak sa k Nou Yòk, epi m pa di anyen sou sa k ap pase Miyami.
Anpil fwa, konpatriyòt mwen yo komèt ti erè sa-a, sitou nan domèn politik : souvan premye bagay Ayisyen fè lè bagay yo ap mal fèt nan politik ann Ayiti, yo gen tandans konpare Ayiti ak lòt peyi etranje tankou Kanada, Etazini, Lafrans kote bagay ap byen fèt. Lè n ap fè yon parezon, youn nan bagay nou bliye souvan se referans ke nou pran pou modèl la. Sa vle di kisa : si m ap konpare Siksè Djaz ki Mayiami ak Djaz ki Nou Yòk, premye travay mwen gen pou m fè se analize ki faktè ki fè bagay yo ap byen mache Mayami. Ki estrikti, ki envestisman, ki estrateji, ki talan, an gwo ki faktè ki fè Mizisyen Mayami rekòlte siksè sa. Mwen sèten si yon moun fè rechèch ou pap jwenn yon sèl faktè, w ap jwenn plizyè faktè ki makonnen ansanm ki eksplike siksè ki genyen Miyami an kontrèman ak Nou Yòk.
Koulye-a, lè m fin etidye sa k ap fèt Miyami, mwen pra l gade Nou Yòk kouman bagay yo fèt, kisa k manke Nou Yòk ki fè bagay yo pa mache menmjan ak Mayami. Nou paka ap fè yon konparezon pou n gade yon sèl kote senpman, rezònman an manke alapapòt. Mwen paka ap pale de lèd ak bèl epi m pa di anyen sou kisa ki diferansye youn ak lòt. Ki kritè ki defini bèl la dabò, answit mwen pral gade si faktè sa yo, kritè sa yo manke nan lòtbò kote yo di se lèd k ap mennen an.
M pa pwofite pou m di : souvan Ayisyen k ap viv aletranje ki wè lavi a bèl, bagay yo ap byen mache, ap byen fèt, yo reve wè Ayiti ap byen mache konsa tou, men pa yon sèl fwa ou pa janm tande yo k ap analize pou konprann pouki bagay ap byen mache konsa aletranje-a. Si m pa konn pou kisa, ki faktè ki fè bagay yo ap byen mache nan peyi etranje, mwen paka ap kouri konpare. Lè m ap di : o, gad jan bagay yo byen òganize bò isit alòske lakay bagay yo gaye, dirijan yo si, dirijan sa, pèp Ayisyen an pa ini, tralala, tralala. Yon konparezon konsa pa fè okenn sans.
Pi enpòtan ankò, konpare 2 peyi mande yon kokennchenn travay rechèch. Pase pou m konpare 2 peyi, se yon obligasyon pou m konn pakou istorik 2 peyi sa yo. Pase, lè n ap viv nan peyi etranje, nou wè tout bagay ap byen mache, se pa yon mirak. Se pa yon bon maten moun nan peyi sa yo leve epi yo wè Bondye transfòme peyi yo menmjan pifò Ayisyen ke yo kenbe nan obskirite (analfabetizasyon, lekòl rans kote elèv pap reflechi sou anyen) ap priye pou Ayiti ak lavi yo chanje. Peyi etranje nou wè k ap byen mache gen rezon istorik pou sa, sa vle atravè listwa pèp sa yo gen yon travay ki fèt anndan sosyete lakay yo, travay k ap kontinye dayè jouk jodi-a, ki fè yo rive kote yo ye-a. Koulye-a, lè n fin chita nou li, nou analize kouman peyi sa yo te fè pou yo rive nan pwen yo ye-a, lè n fin fè travay sa, atò nou va gade kisa ki pa fèt Ayiti ki fè nou nan tenten nou ye-a.
Lè n fè travay sa-a ki mande pou n li, analize ak reflechi n ap dekouvri ke tout peyi ki pran chiman devlopman fè menm travay la anndan sosyete yo pou yo chanje mantalite moun ak mete yon seri enstitisyon sou pye pou rann peyi yo pwodiktif, dinamik. Sitou tout peyi ki pran wout pwogrè fè sa nou rele yon Travay Konsyantizasyon lakay yo. Se yon bagay mwen ka demontre pou nou, m’a va devlope analiz sa nan yon lòt kòmantè nan Seksyon Let’s Talk KM lan.
Tout devlopman sa-a pou n di ke lè n ap reflechi gen kèk règ ki dwe swiv. Li pa toujou bon pou n jis pale. Gen yon minimòm prensip ki dwe respekte. Roody pa fin devlope tout agiman yo men li pa twò lwen prensip pou nou konpare 2 reyalite kèlkonk. |
|
