KOMPA! MAGAZINE Forum Index KOMPA! MAGAZINE
The site for Haitian Music News as it happens, debates & more.




 
This forum is locked: you cannot post, reply to, or edit topics.   This topic is locked: you cannot edit posts or make replies.    KOMPA! MAGAZINE Forum Index -> Sex
View previous topic :: View next topic  
Neg Timid



Joined: 06 Apr 2006
Posts: 3258
Location: Brooklyn, NY/Gonaives-Artibonite

 PostPosted: Mon Feb 10, 2014 2:41 pm    Post subject: Reply with quote Back to top

An n Fete Retou Michou ak Tout Love Li Pou Nèg Timid

Le Retour De Notre Fille Prodigue

Jou selebrasyon Retwouvay Michou ak Nèg Timid, a se (7) tè tapan, Papi Jòj pran lapawòl pou swete tout moun ki vin nan fèt la la « Byenvini ! »

Papi Jòj te pale konsa:

— Mèmè ak Granpa, Bèlmanman ak bòpè Klod, mes oncles et tantes, mes chers frères et soeurs; toute la lignée de mes cousins et cousines à tous les degrés de cousinage; chères Amis et Amies (ies), tous les alliés, toutes les connaissances de la famille et vous aussi le resquilleurs qui ont envahi la maison sans être invités... Au Nom de la famille Pierre-Fulbert, je vous souhaite la Bienvenue au grand Roumblé que nous prenons plaisir à organiser à l'occasion des Retrouvailles de Michou et de Nèg An Nou.

Nous souhaiterons que vous vous amuserez follement, chacun et chacune garderont le sourire et resteront d'agréables convives. Que votre joie communicative donc transmissible vous suive après ce Babako inspiré par les frères et soeurs, cousins et cousines et les amis proches de Nèg An Nou en l'honneur de sa dulcinée Michou qui lui apporte Tout l'Amour Du Monde.

Oh ! Oh ! Sa k'ap pase la a? Tann mwen... Epa kèk engredyan ki pa envite ap pouse, bouskile, bay gagann nan baryè lakay mwen pa gen sa, kouzen, zanmi, Ti Zòrèy, Gwo Jera, Zo Pwason, al met lòd nan dezòd fèmen baryè a, epi moun nou konnen sèlman k pou rantre nan banbòch aswèya. Nou pa ta renmen fanmi an depase pa evènman an. Nou deside resevwa anpil moun, men nou pap ka okipe tout dezevre sa yo k'ap pran daso vin pwofite nan plezi gaye n'ap simen la-a.

Wè ! Se Vre, Gran Mèt la pèmèt nou fè yon gwo kandyanwou pou larèn Michou ki retounen ak lagras de Dye vin konsole pitit mwen Nèg An Nou.

Devan nou tout, kòm Papa Nèg An Nou, m'ap remèsye Bondye nan syèl ki mete lalimyè lan tèt Michou, ki klere chimen retou l, pou l te tounen kòm sa dwa vin geri Nèg an Nou ki te fin pèdi tèt li. Nou tout, te konstate sa, depi n te gade Nèg an Nou ki t'ap mèg nan tèt, ki te fin tounen yon zoban, ki t'ap pèdi pwa, ki pa't gen lapeti ankò, ki pa't ka manje, ki te koumanse ap pale pou kont li. Kanta pou mwen Papi Jòj mwen pa kache di n ke n tante tout sa n te konnen pou n te geri pitit nou ki te nan move pas. Non sèlman Madan Jòj manman l ak tout sè l ak frè l yo, kouzen, kouzin menm sèvant yo t'ap lapriyè; men sèten zanmi te mennen l sòti, al nan tout reyinyon kote k te gen bèl dam byen byen anfòm, byen kanpe, bèl koulè, kite lekòl, ki save; nan tout fèt, nan "kòktèl pati" (cocktail party), menm nan fèt chanpèt, yo prezante l anpil bèl nègès youn pi bèl pase lòt. Nèg an Nou pale ak yo (2) de jou anpi, apre sa li twipe yo, kòmsi yo te manje gate. Se yon bagay okenn moun ki byen nan tèt, ki lisid pa ka konprann. Nou rekonèt anpe nan bèl gengenn m'al pale nou la-a: Mirèy, Magi, Dada, Gladys, Jizèl, Adriyèn, Ivana, Kòkòt, Aloud eksetera era; m gen non tout bèl medam sa yo nan kaye m, kote chak swa anvan m'al dòmi, m rapòte tout sa k konsène fanmi an pandan jounen k sot pase a — Mezanmi, m t'ap mande tèt mwen sa k'ap pase Nèg konsa-a: bouch Nèg pa gou, Nèg pa ri ankò, Nèg ap reflechi, ou santi l byen lwen, li pa't sou tè isit menm.

Anfendkont, se Ayisyen nou ye, kèk bon zanmi fanmi an mache al konnen nan Lakou lakay yo sa k'ap pase la-a... Mèt Lakou yo asire zanmi nou yo ke tout bagay ap rantre nan lòd, ke bèl dam bwòdè a ki te vire do l lale a te reyaji sou kondisyon l te genyen ak Nèg an Nou, plis pou kouraj ak jefò, paske li toujou renmen Nèg li, ki toujou wo nan kè l eke tout bagay ap rantre nan lòd yon jou konsa, san n pa atann: Nanpwen rivalite, nanpwen diskisyon, nanpwen chita tande: De (2) vèditè latè sa yo ap reyini pou lavi san pwoblèm.

Alò pou lafanmi Pierre Fulbert li te lè, li te tan ! Se ak yon grap plezi m'ap prezante Fanmi an ak tout zanmi tout konesans nou, zwazo nou pa wè fasil sa, zwazo paradi sa-a Nèg an Nou te fin fou ap imajine, reve gwo jou a, ki tounen pou l rete nan kalòj Nèg jous kaske yo mouri... Men Michou !

(Anba bravo, siflèt, rèl, bèl mèvèy la, wo, bèl, byen kanpe, anfòm parèt ak tout Nèg Timid k'ap ri jous nan zòrèy li anpi (3) vyolonis jwe Plasir d'Amour (Plezi Lanmou) pou chase move tan ak move zè yo...

Papi Jòj annik fin fèmen bouch li, gransè l kouri kontinye konsa:

— Nou tout ki reyini la-a ak lafanmi, lèzalye, lèzami ak tout konesans nou yo epi menm legetè, kirye, jouda, fouyapòt, tripòt ki pral pran plezi, fete ak nou san envitasyon ( m ta mande yo pou yo pa fè sa k pa sa pou yo adapte yo a sikonstans yo mete tèt yo ladan yo, pou yo kondwi tèt tankou moun byen elve) paske pawòl la di nou, lè ou vin ka moun, ou gade tou sa moun yo ap fè pou ou kopye sou yo, imite yo, chare yo pou ou fè tou, se pa difisil... Alò m ta priye nou angras, pou n pa mache sou gazon yo, pou n pa kraze plant ki lan lakou a, anpitou lè l fè yon lè fèt la fini, pou nou tout ale pase yon trè bòn sware nan lapè, Lanmou ak lajwa !

— Envite yo ak tout Pakapala yo bat anpil bravo apre Tant Beti fin louvri fèt la... Sèten gason ak fi grate gòj yo, kèk gran manjè tate vant yo; anpe visye vale saliv yo tèlman yo santi yo ta kouri sou tout plat yo ki te byen prepare, byen fiman, byen cho; gato ak krèm ki t'ap tann pou desè - Men mezanmi, se pa detay tripòt non, ondirè te gen bouyon, tèt kabrit, bouyon kou pwason, bouyon pye bèf, bouyon zantray tout ak bon jan viv ladan yo... Kafe, chokola, te, tout kalite ji ki ekziste, tout bagay sa yo, chiktay mori, janbon, aransò ak pen oswa kasav, ak non yo sou yo an franse ak an kreyòl nan (2) de lang peyi nou an: Poisson Séché= Pwason Sèk; Poisson Salé A la Vapeur: Pwason Gwo Sèl; Poisson en Sauce: Pwason Nan Sòs; Poisson Boucané : Pwason Boukannen; Cabrit Grillé: Kabrit Griyé; Cabrit en Sauce: Kabrit nan Sòs; Grillot de Porc: Griyo Kochon; Cochon et Mirliton: Kochon nan Militon; Cochon en Sauce: Kochon nan Sòs; Filet de Boeuf: Filè Bèf; Crabes en Aubergine: Krab ak Berejèn; Ecrevisses Sautées: Kribich Sote; Ecrevisses Marinées: Marinad Kribich; Crabes en Mirliton: Krab nan Militon; pain au beurre: Pen bere; Fromage: Fwomaj; Pois et Riz Collés: Diri ak Pwa; Pentades en Sauce: Pentades nan Sòs; Yam Bouillis: Yanm Bouyi; Lambi Grillé: Lanbi Griyé; Lambi en Sauce: Lanbi nan Sòs; Bananes Frites: Bannann Fri; Bananes mûres Frites: Bannann mi Fri; Fricassées de Pigeon: Pijon Fri; Riz Blanc et Pois Congo en Sauce: Diri Blan ak Pwa Kongo an Sòs; Pommes de Terre Bouillies: Pòmdetè Bouyi; Pommes de Terre Frites: Pòmdetè Fri; Pommes de Terre au Four: Pòmdetè Kwit nan Fou; Canards à l'orange: Kana nan ji Zoranj; Dinde Farcie: Kodend Fasi; Coq au Vin: Kòk nan Diven etsetera era... Bwason menm, pa pale pawòl sa-a, tout kalite whiskey, byè, wonm patikilyèman Babankou; soda, seven-up, Koka-Kola, Pepsi kola, kola chanpay, oranj, rezen, (grape juice); menm kleren te genyen, labsent, mant, zo-devan, Kanpe King...

Epi tou fanm an ak tout zanmi yo te konn òganize mezanmi, yo monte yon ti gwoup ak (16) sèz mizisyen nan antouraj yo: (2) Kouzen: Ady ak Renòl sou saksofòn, (2) lòt kouzen ak yon zanmi ak piston Jak ak Jera anpi Loran; (3) zanmi sou tanbou Chal, Sègo, Jan (1) yon zanmi Maksim sou batri; (2) zanmi twoubadou ak gita Makso ak Jilbè, (1) yon kouzen Albè ak flit li (1) yon kouzin Marie-Anne sou pyano lakay lan, (1) zanmi sou Akòdeyon Frannzi (1) yon lòt zanmi Kalo ap souke Tcha-Tcha l l'ap chante, (1) yon lòt Michèl ap chante ak graj li, Moris Sajil enpwovize l chèf òkès la k'ap amonize tout atis yo.

— Tout mizisyen swa espesyal sa-a, youn ap ede lòt, kote youn faya, lòt la ranje pou li... Anfendkont se pou n konprann, yo pa pwofesyonèl, anpi fanmi an te vle pran DJ, se Clara, sè Nèg an Nou ki anpeche sa fèt, lè l di, " An ! pa mete okennn DJ nan mitan n, li pral vin jwe mizik pa l li renmen, anpil l'ap vin ranse la-a, an n fè zafè n pou kò n" - Se ke tout fanmi an apwouve.

— Si m sonje byen, men anpe nan chante sikonstans Michou ak Nèg an Nou t'ap viv.

— Premye mizik yo frape se te « Blue Moon » Lalin Ble.

1. Blue Moon, you saw me hanging around ~ Lalin ble, ou wè m'ap flannen
Without a love of my own ~ San ti cheri pa m nan
Without a love in my heart ~ San okenn boubout sou kè m
(Epi yon kontinye ak yon mizik Panyòl)

2. Aquel amor qué marchito mi vida ~ Lanmou sa-a ki te twouble vi m
Aquel amor qué fue mi perdición ~ Lanmou sa-a ki lakoz pèdisyon m
Dónde andarrás aquel aquel amor? ~ Ki bò ou fè, lanmou, bon lanmou sa-a?

3. (Kreyòl) ... Michou vire lòlòy Nèg An Nou
Ki mande konpoze kouraj -

4. Hace tiempo que yo tuve una ilusión ~ Sa fè lontan depi m'ap kouve yon ilizyon.
Hace tiempo que en tus brazos me dormia ~ Lè m'ap sonje ke m te dòmi nan bra ou
Y yo inocente muy confiado ~ Epi nayif ke m ye, m te fè ou konfyans
Té entregue mi corazón ~ M te lage kè m nan men ou
Este tiempo tan feliz ya ha vuelto ~ Tan byennere sa yo tounen
Has puesto fin a mis decepciones ~ Ou mete yon fen nan desepsyon m
Yo cariñito, bendigame con tus besos ~ Kounyeya cheri, beni mwen ak ti bo ou yo
Emborrachame de sentimentos ~ Fè m sou ak bon santiman
Qué Amoroso mas y mas ne quedaré ~ M'ap rete damou depli zanpli

5. Men ti manman fè ti ba pou mwen
Pa kite m ale, ti manman fè karès
Pou mwen, Pa kite m ale
Depi kèlke jou se yon sèl pawòl
Ki nan bouch tout ti moun
Ki pral lekòl
Mwen menm avèk ou nou se (2) de pijon
Kape viv lavi jouskaske n mouri

— Pandan fèt la ap fèt, gen moun k'ap koze sou tray Nèg an Nou pase; lòt fanmi ak zanmi ki konprann di: « pase yon trè sou sa, efase l, sa fini epi sikonstans yo pa la ankò, pa gade dèyè, ann akeyi lavni an ak lajwa nan kè nou; reyalite a, moun yo ansanm ankò tankou (2) de ti pijon » - Gen dezòt moun ki toujou sansib ak sipèstisyon yo, ki deklare: « Ah Mezanmi ou mèt di moun sa ou vle, men depi ou wè fanm sa-a lè l sote sou ou, ou wè l pa pou kont li, li deranje bon nanj ou. » - Zanmi enkondisyonèl Nèg an Nou reponn: « Ou pa janm konsidere, mezire moniman Michou reprezante a, se sòf si ou nan estad Laza san Jezi pou ou pa bat je ou, mòde lèv ou, rele wi **** lè ou bare ak dam sa-a, li sipè bèl, li wo, lan fòm, lenpozant, Ah remèsyon Leseyè se nan makout Nèg li rete pou lavi Alelouya ! (1000) mil fwa !

— Tan sa-a, gen moun k'ap sèvi, kwake gen tab gani; men moun ap sèvi pou ede timoun ak twò granmoun nan fanmi an ak nan lamitye yo, pou yo fete byen san pwoblèm. Se konsa tout zanmi fi ak dam nan lafanmi Pyè Filbè ak sèvant ki entegre fanmi an pase yo gen plis pase (15) kenz (20) ventan y'ap travay ede-soulaje fanmi t'ap sèvi, anpil tou t'ap sipèvize pou pa gen twòp dezòd ak derapaj...sitou lò sèten moun vin afre sou manje ak bweson.

— Mizik dous t'ap jwe pandan yo t'ap sèvi premye plat yo: se te chokola, kafe, te, sandwitch, pate, bouyon (tout kalite) anmize-dyòl (amuse gueule) an kònè ki gen vyann fasi, vyann moulen, janbon, fwomaj, ak epis, gen moun ki okòmansman pase ak yon gwo kòp plastik, apre sa yo vin ak de (2) pandan ke moun k'ap akonpanye yo a, vini ak (2) de asyèt pou yo pran pate, sandwitch, anmize-dyòl, akasan selon gou yo.

Kounyeya yo fin sèvi ak atansyon ak prekosyon tout timoun yo, pitit kay, pitit zanmi, ladan yo nyès, neve, kouzin Michou anpitou tout timoun bidonvil nan katye a ke fanm yo te mennen, si ou wè yo, byen abiye, byen penyen ak ti kokad yo ak barèt yo nan cheve yo, ti rad yo byen pwòp, soulye yo byen klere. Apre sa yo sèvi tout kolonn envite yo, ki t'ap souri, bay blag, youn t'ap anbete lòt tou, pou yo ri, fè youn te moke lòt - Lè tout envite yo fin pase; kiyès ki parèt? Eben se tout gwoup anvayisè yo, sa k gen ti levit, sa k gen levit twò long, ondirè: « gwo menm pri, piti menm pri », sa kòl la byen kwochi, sa k gen cheve yo gaye ki pa gen tan penyen, sa k pèdi pratik peny yo, cheve a pa pran dan peny lan, li fè ti pwav ak ti boulon ki gen yon ti koulè jòn; genyen menm ki gen chemiz yo sou pantalon yo; koulè chemiz lan pa matche ak pa pantanlon an ni ak soulye ki nan pye yo a; men tout moun byen pwòp, pèsonn pa sal -

— Lè twoup depaman sa resi rive devan tab kote yo t'ap sèvi a, yo kontre ak Rozèt, gwo sèvant wo a ki pi ansyen ka Madan Jòj la. Rozèt akeyi yo konsa:

Rozèt — Men sèlman, Madanm nan pa't avèti m, li pa't pale m de envite dènye lè sa yo non.

Elvesiyis — reponn li, tankou l'ap amòti move pwent Rozèt voye a - Men wi Rozèt, nou vin nan plas nou, bèf dèyè bwè pi bon dlo, epi kote ou janm wè Rozèt lè Nèg An Nou ap jwe foutbòl ak nou, epi lè l sou bèf li, li bezwen bliye li vale ti gwòg li ak nou, sa ou gen tan gen la-a Rozèt, nou vin an dènye, nan plas nou, paske jan m eksplike ou la a bèf dèyè bwè pi bon dlo.

Rozèt —Wi, m dakò, m pa't la nan jwèt foukbòl nou yo, men sèlman isit la m toujou prezant, pinga nou fè dlo n'ap bwè a vin twoub. Nou nan katye a se vre, men mache ak lonè n pou n jwenn tout respè nou, pa vin fè voksal la-a, m pale nou.

Tant Beti — Gransè Papi Jòj la avèti band lan: sèlman n tande sa Manzè Rozèt Responsab kay la, Mèt kay la di la wi. Li pran chaj, l'ap voye je sou nou epi sa l di se sa.

Elvesiyis akyese: Rete kè pòpòz manmi, nou se lafanmi, nou malere se lavi a, men nou respekte moun epi nou respekte tèt nou.

Papi Jòj ki konprann lèchoz entèvni pou l rasire mesye yo.

Papi Jòj — M kontan Bondye geri pitit gason m nan, fèt la gen pou tout moun, rich kou pòv, tout zanmi fèt pou patisipe, ti mesye manje, bwè, fete degaje n, kondwi tèt nou byen, pa fè dezòd... pinga kont ! M konte sou nou.

— Yon bravo frape fò apre pawòl Papi Jòj yo, gen nan ti mesye yo ki militan politik ansanm ki rele: « Viv Papi Jòj papa bon kè ! » Nou la a avèk ou, rete kè poze ! Anpi Dyeviyis rele Anatòl, Manno, ak Aselòm, yo di y'ap met men, kenbe fò pou pa gen derapaj.

— Antwòt, n'ap fè ti tripotaj. Papi Jòj rele Rozèt sou kote, li di l fè Absalon ak Derame al chita kote band pou pa gen anyen k kase; se ke Rozèt fè imedyatman.

— Menm lè a, Koryolan ak Sidwàn tonbe nan diskisyon pou chokola ak te, youn ap rale bèl bòl aliminyòm vin jwenn li alòske Mèsidye ak Dèlkam manke goumen pou rès AK 100 an. Papi Jòj wè sa, li di Rozèt pou l replen bòl chokola a ak bòl AK 100 an - Rozèt reponn Msye Jòj ke: « pa gen ankò, sa k rete a se pou pèsonèl ka sèvi nan kay la. »

— Papi Jòj pa fè tèt, li rele marenn li, gransè l Tant Beti pou l fè sa l konnen pou l refè chokola ak akasan pou envite espesyal li yo.

— Rozèt tande, anpi li fè kòmsi l'ap pale pou kont li, li di miwo-miba, sa tonton an genyen li kole pou l fè moun sa yo plezi konsa a lakay la, ala yon bèl Amou chè ! anpi li eklate ri.

— Papi Jòj ki te anvi l deja, paske l te konprann se Rozèt ki t'al rakonte Madan Jòj kote l te wè l a Madan Moris, rele Rozèt vin jwenn li nan kwen an dèyè salon an anpi l di Rozèt - « Men wi, lavi a bèl pou ou Rozèt, w'ap ekri sou (2) de tablo, epa mwa pase a, w'al rakonte Madanm nan ou te wè m pandan w'ap pase bò estad anba tcha-tcha yo ak Madan Moris m te apiye sou machin lan pòt la ouvri, anpi Madan Moris sou lestomak mwen, m te wè ou wi, lè ou wè m'ap gade ou, ou vire tèt ou anpi ou kouri tou dwat vin rakonte Madanm nan, fèzè, tripòt.

— Msye Jòj, madanm nan pa peye m non pou m fè siveye rapòte pou li. M te menm bliye espektak sa-a, ou t'ap ofri nan lari leta a san kloti, san paravan, m te wè men m te kenbe sa pou mwen, m pa't janm pale - Fòk ou pa fè peche lè ou akize m san rezon, byen ke m pa ta twò fache si madanm lan ta rale zòrèy ou pou kalite bon zouti sa w'ap simen bay Madan Moris ki pa seryèz, pa gen anyen pou l fè.

Papi Jòj — Kouman ou fè di sa, Rozèt, ou swiv madan Moris, ou konn mès li, ou konn kote l'ap travay?

Rozèt — Wi, Msye, Moris mouri gen dezan, se pa pou sa pou Madanm li ap fè lamadèl konsa a. Epitou, m pa p fè anyen pou fè ou mal, men m se yon fi tou, m ta ka fè jalouzi, lè m sonje kalite bon jan swen, bon jan karès Madan Moris pral jwenn, menm jan ou konn trete m byen dous lè Madanm nan pati ap pase dezoutwa jou kay sè l ak frè l Miami ak Òlando...

Papi Jòj — Pawòl la fini la, ann regle koze ou, ou te di m pou m chanje kabann lakay ou anfème a, m'ap tou ba ou ti frijidè ak yon ti fou tou, paske m pa kache di ou, sèvis ou bay la fè kè m kontan... Na wè pita, apre fèt pou n regle sa.

Rozèt — Mèsi Msye Jòj, omwen ou pa bliye m pou Madan Moris, Bondye te ban m don pa m tou pa vre?

— Tan sa-a, fèt ap kontinye, yo sèvi sa k pou ogmante lapeti tout moun, men ki ka plen vant yo tou: marinad, akra, bannann peze, menm pate kòde, sosis ak ti pwason fri - Tout moun debyen pran pou plis (2) de marinad, (2) de akra, (3) twa bannann peze, genyen k goute pate kòde a - Men lè y al sèvi pèp la, dènye envite yo, yo fè va sou marinad chiktay ak pen, akra ak bannann peze a yo pran pa (6 ou 7) sis ou sèt, anpi yo kwipe pate kòde a tankou yon jerenons (je renonce) paske se manje pèp; yo tou pwofite nonmen non Rozèt an mal: « Se fanm y'ap bay pou Rozèt la wi, ki fè sèvi n pate kòde tankou fòk se li, na vale l, ala pèmèt, la jwenn ak nou yon jou..»

— Se sajès Dyeviyis ak Elve ki kouri pran (2) de pate kòde yo manje l, li bon, men l plen piman, yo kouri bwè yon koka byen glase dèyè l, ki fè yo kite koze sa-a, chak dènye envite degaje l manje yon pate kòde ke yo twouve k bon.

— Anpi, mizik dous, kòm mizik cho ap jwe, moun ap danse, Michou ak Nèg li bay cho danse kole amourezman... Gen lòt dansè ki t'ap chèche imite yo men patnè fi yo t'ap danse a pa't obeyi.

— Pou moman sa-a, vin gen yon brek nan sèvis manje a ak mizik djaz enpwovize a t'ap jwe a. Malere ak malerèz ki te pran baryè daso, lè yo t'ap envite tèt yo a t'ap pwofite pale, devize, fè lespri yo travay pou yo konprann sa k'ap pase a. Yo t'ap mande tèt yo, pouki sa fèt sa-a? Alò, nèg ki pi fouyapòt san katye a Masèl Ti Zòrèy pran lapawòl pou l eksplike ke Nèg An Nou te renmen ak dam nan, ki kite l, l'al nan peyi l... Nèg tèlman damou li manke pèdi tèt li.

Masèl Ti Zòrèy — Dapre sa m tande, (2) de Mesye-Dam yo te tonbe damou fou, yo t'ap fè sa k pa dwa, yo te fè bèl mèvèy. Anpi selon lari a, gen lè yon monpè oubyen yon pastè frape Levanjil Kris la oubyen yon Bib sou tèt Michou ki te cho. Alò Michou vin santi li malalèz; li vin yon ti jan jennen, li t'ap katyoule sa pou l fè pou l fè Nèg Anlè a plezi, byenke ti bakoulou Msye Jòj la vire lòlòy li. Alò, Michou gen lè di kèk sòm oubyen fanmi l monte kèk bon batri... Egal Manzè Michou vin reprann sans li, li reflechi anpi lide l di l demake, l'al kache nan pwovens ka Matant li ki gen yon gwo Lakou, kote yon sèvi twa (3) lwa dife: Marinèt, Loko Basiye avèk Ogou Badagri san konte zonbi ak baka sosyete sa a genyen. Michou pase (11) onz mwa antye ap pran swen...

— Men kounyeya a li tounen, sèten li pa pou kont li, li vin pran san l pa pote bay, rive l rive li fè Nèg An Nou konnen ke: « Men Mwen ! » Li vin kare ak Nèg pa vre? Tout moun rete ansilans y'ap koute Masèl. Sanble lè tivoudra a frape Nèg ki vole anlè (7) sèt fwa, li mate si ou konn yon boul kawotchou k'ap rebondi... Epi nan kontantman « kejeswizere » Nèg nou tande l rale yon gwo souf kòmkwa se bon nanj li ki kite l, anpi moun ki te la tande Nèg ap reponn: « Se bon, Se trèbyen, m dakò ak tout sa ou vle cheri, men sèlman fwa sa-a w'ap pwomèt mwen ou pap fè yon pa kita, yon pa nago, ou pap janm al okenn kote san mwen - Anpi, tankou yon patekwè ki santi priyè l monte, gras la desann Nèg tonbe rele: « Mezanmi Wo ! Gras Mari Gras, Leseyè egzose mwen ! Fanm dous mwen, mèvèy mwen an tounen, men l pral vin wè m; m pa konn si m anlè, m pa konn si m atè. Manman, papi, Monnonk Jak, Tant Beti marenn mwen, Monnonk Ti Wil, Tati Ga, Tati Mari avèti tout kolonn kouzen, kouzin mwen yo, zanmi, vwazen, vwazin, Granpè, Granmè, n'ap prepare yon gwo babako ak tout yon kandyanwou pou n resevwa Michou kòm sa dwa...

Mari-Jo Dezagreman entewonp Masèl pou l deklare

Mari-Jo — Wi pip, se yon fèt ki pa rete ak fèt, se yon bagay moun pa wè fasil, fanmi Pyè Filbè dwe depanse plis pase (50.00) senkant mil dola meriken nan flè, nan bweson, ak nan manje. Mezanmi se pa ti gagòt non, nou tout la-a nou fè, nan ti goute senpman Papi Jòj bay, vant nou preske plen epi gwo manje a poko sèvi - Anpi se pou n deklare fèt la grandyoz. Gade yon ka, Nèg gen lè li tefin fou vre, Absalon t'ap rakonte ke Msye te koumasne pale pou kont li. Men gen lè gwo bèl fanm nwa wo sa-a pran Msye byen pou Nèg egare konsa a pou li. Li chita ap mande tout moun yon ekleray, yon eksplikasyon sou tout sa l'ap plenyen ki sot pase l la-a ak kalite bèl dam sa-a ki sanble rèn Ezili Dantò a. Nèg An Nou t'ap pale jan l sonje donzèl sa-a; jan l te bon pou li, jan l te fè l wè lesyèl san l pat ko mouri... Men, si Msye te reflechi vrèman, li ta kenbe wòl li wi, paske sinikman, ak mechanste tankou yon femèl tig san pitye Michou te lage Misye nan rivyè k'ap desann nan, nan kalfou tenten, Manmzèl te chape poul li, li te sove tankou yon chat mawon, siman l al peche lòt sourit oubyen l'al banbile ak lòt gason ki pi gason, ki pi nan boka li...

Elvesiyis kouri entewonp Mari-Jo -

Elvesiyis — Mari-Jo, w'ap chache yon kont ki twòp pou ou, « lè w'ap fouye zo nan kalalou », kote ou konn fi a pou w'ap ba l gwosè chay sa-a pote? Dapre sa m konnen, Manmzèl w'ap pale a y'ap fete jodi sa-a, aswè la a pa fèt tankou tout fanm, se yon boul dyaman li gen nan mitan janm li selon Mèt afè a Nèg An Nou ki pa ka bliye l....

Elvesiyis vin pe koup, paske Michou, Nèg An Nou, Papi Jòj, Madan Jòj ak tout Rozèt te vini bò tab yo a, pou remèsye yo pase yo te vin « an foul » patisipe nan fèt an lonè Michou pitit yo a ki te pa ti a, sa yo rele fi pwodig la... Tout moun sou tab, menm sa k t'ap voye kout lang fè Michou konpliman ke l merite dapre Elve paske fanm sa-a twò bèl, li pa nòmal, se pa atè a menm jan ake nou li sòti, fòk yon moun rekonèt sa.

— Pandan mizik cho ap jwe, moun ap chante, danse, ponpe sonte, mete bra yo anlè, yo bay lòd sèvi manje a sou « sèlf sèvis », sèvi tèt ou, tab gani, estil ayisyen. Men yo fè moun pwoche manje pa tab de 1 jouska 21 ki te dènye tab la. Ay tonnè, nèg ki pretann yo se bèf dèyè yo, ap graje yo pa ka tann, gen anpil ki odasye ladan yo, k'al antre nan premye ran depi yo rele tab Nimewon (2) de a. Apre sa (4) kat ladan yo ale lè tou pa tab Nimewo (3) twa a; (4) kat lòt ale fi kou gason, lè yo rele tab nimewo (5) senk, jouskaske lè yo rele tab (12) douz la tout dasomann te chita byen trankil ap devore meyè mòso vyann , bon diri djondjon ak kribich, makawoni ograten, blan kodend, epi yo pran byè yo pa (3) twa, koka pa (4) kat, boutèy dlo pa (2) de... Tab yo a vin pi byen gani apeprè pase (5) senk tab long k'ap sèvi tout moun nan... Men sèlman, gen yon kote ki nan blakawout, (3) twa nan envite dènye è yo, te gen bezwen ki kenbe yo; ebyen tou senpman yo kouri al degaje yo kote deyè pye sitwon ak pye ònemantal, pye imòtèl woz, blan, pye jasmen ki t'ap pafime nwit lan kay Papi Jòj la - Anpi, pa malè pou yo, pèsonèl la ak sekirite bare yo, ansanm ak Tant Beti, ki santi l ofiske, li fache, li pa pale yo mal kòm malere ki tounen voryen san lizaj, li fè yo konnen jantiman, men fèmeman ke se pa konsa envite konpòte yo ka moun eke gen kote pou sa, mande direksyon twalèt la, latrin yo, anpi yo montre yo, yo ale la... Tant Beti anchaje sekirite ak (2) de gason yo pou yo pou gide yo kote pou yo al fè bezwen yo dan lapwòpte... Pèp oh !

— Foul envite a anvayi tab ladoudous sa-a, se ak anpil difikilte, lafanmi, sèvant yo ak lèzami fi distribye desè a yon jan pou tout moun jwenn, envite dasomann yo dwe pase omwen twa fwa, pou yo pran sere, pote lakay yo, menm jan yo te fè pou manje a kote twa ka (3/4) nan yo fè « take out » pran pran pote lakay.

Pi gwo evènman nan sware a — Se lè a twazè dimaten, Michou ak Nèg vin salye moun pou di mèsi pou ti tan yo te pase ak yo, nan yon moman gran bonè pou yo, anpi al repoze yo lakay yo nan lapè - Yo tou pwofite anonse envite yo a ke Michou ak Nèg deside marye sivil nan lentimite le 2 mas, dimanch kanaval la, anpi (2) de samdi apre Pak, y'ap marye relijye. Envite yo rele bravo, Bòn chans a koup senpatik sa-a, ki fè yo jwi yon si bon moman nan nwit sa-a. Tout moun pran chemen baryè, pou y'al monte nan oto yo, pou rive lakay yo.

— Men Michou ak Nèg An Nou, mare men nan ren, y'ap bo san rete epi dlo kouri nan zye toulede, youn ap fè lòt repwòch...

Nèg — Apre anons maryaj nou an, kè m yon ti jan poze, tansyon m desann, m pa pè anyen ankò, m santi m lib, m tounen nòmal kounyeya ke nan kèlke jou Michou pa m nan ap pou mwen pou lavi ak kalite pwomès ou sot fè m nan pou ou pa janm kite m. Rakonte m kouman ou te fè viv, san konsekans avè m, ou pat pran m pou sapat kite nan pye ou nan chanm lan, ou fè m kriye an sekrè, ou fè m plenyen toutan, ou t'ap fè m pèdi tèt mwen, tout moun te wè sa, m t'ap megri, se latonb ki t'ap tann mwen. Ou pa't janm pran m an konsiderasyon tout jès m te fè apre m te fin pran san m pou leve defi ou te lanse a lanteman, jantiman nan koutwazi lanmou. M voye flè, pafen, m mennen ou kakay ou ak sekirite, m t'ap reflechi, m pa't ka pale menm lè m te wè, m pran nan pèlen apre kalite chedèv sa ou te remèt sou kabann nan. Men ou jwenn mwayen, ou fè sa tèt rèd ou a di ou la, ou boule tout kontak ak mwen, ou sove, pèsonn omond pa't konn kote ou te fè.

Michou — Men Nèg, konnen ke mwen menm tou, separasyon ou te fè m trè mal... Men fòk ou reflechi tou. Ou pa wè sa ou te fè m tou. Ou trennen m nan labou, ou pase pou mwen, ou fè sa fasil avèk lanpresman, se mwen k pou te tanpere ou. Ou ale jisko bou san pran souf. Ou gen lè ou pa konsidere sa ou fè m nan tou. Tout moun te konn kondisyon ke ou te aksepte, anvan tout bagay te kòmanse, kidonk kondisyon se kondisyon. Lè n te fini jou sa, sa te fini, bliye m, bliye telefòn mwen, bliye adrès mwen, bliye m egziste, se pa't sa?

Nèg — M'ap entewonp ou Mich, pou m di ou kondisyon sa yo se idyo ak moun fou ki poze yo epi ki aksepte yo. De (2) moun tèt dwat tankou nou pa't dwe retni yo apre gwo bèl aksyon sa-a nou te devlope a, relasyon n te vin pi etwat...

Michou — M'ap oblije koupe w lapawòl ankò Nèg. Ou pa santi fò n te pran distans nou, fòk nou te detache, fò m t'al kache pou lawont laviktwa ou sou mwen lè bon jan lanmou sa yo nou te fè yo, lemond antye te okouran. Kouman m ta fè viv, kouman m ta fè parèt an piblik apre tout pi piti detay ou menm Nèg te kouri al rakonte tankou eksplwa Desalin te fè sou Napoleon an...

Nèg — An n pa pale de sa, pase se pa nòmal, se pa natirèl youn kouman bagay sa-a fè gou , sere, bon, pafè, santi bon, bèl, gen bon gou, nanpwen anyen k te manke epi se sa k fè m'ap pèdi tèt mwen an, ou te konn sa, se sa k fè ou te mete vye kondisyon drastik sa yo... Mezanmi m pa kapab ankò, an n antre lakay la.

Michou — Non, men se pou m ale, kantite moun sa yo ki envite nan retou m avèk ou, matant mwen yo, kouzen, kouzin mwen yo, dezoutwa bonzanmi m, sa yo panse, sa y'ap di.
Nèg — Men reflechi non Michou, nan yon mwa n'ap Madanm ak Mouche se Madan Jan-Lou y'ap rele ou, ki mele ou a tout moun, ann viv pou tèt nou dabò.
Michou — Ou pa santi plis nou rete san n pa fè sa, plis youn ap anvi lòt.

Nèg — Sa Michou ap pale la-a, gen lè se nan Mè ou t'al antre kote ou te ye a, yo deranje ou, y'ap montre ou lanmou, lanati ke Bondye kreye a se yon peche, se yon wont, ase betize non. Ou gen lè ou pati pou fè m fou ankò. Ou vle fè m pran lari a ak kòl mwen mare sou dèyè m, de (2) gan nan pye m, pè soulye m sou tèt mwen, se sa ou vle wè pou ou vanje ou nèt.

Michou — Ok. M'ap rete dòmi, men nan yon chanm apa, avèk sè ou yo.

Nèg — Sa k ap pase la-a, ou gen lè ou chanje metye, ou pèdi wout ou. Sa medam sa yo gen pou wè ak ou. Ou pral dòmi nan chanm moun ou Nèg A ou Jean-Lou Fulbert, menm si zye ou rete ouvè kale tout rès nwit, menm si ou fè grèv ou pa vle m manyen ou... Alò pouki sa ou tounen la-a, pou tout fanmi m ajenou nan pye ou, pwomèt ou maryaj devan lemond antye, anpi pou ou leve wale, kite m nan petren.... Mwen te toujou tankou yon gwo enbesil, yon ti nayif ki pa't ka konprann yon reyalite, pou m te tou mare bèl gwo chat (bòbòt) dangore sa-a, pou m te fè l manje tout sosis mwen an jis nan rasin. Ak sa, m pa t'ap gen pwoblèm pou tèt mwen pati kounyeya. Lè mèt chat la ta vle tounen, li ta tounen, epi l ta jwenn avè m tou, tankou li konn jwenn avèk mwen....

(Yo tou (2) de eklate ri ! )

Michou — Bon ! Bon ! Bon ! Ti plenyadò, ok men fè moun yo pare chanm ou an.

Nèg — Ke l andezòd, ke l tèt anba, ke l pa nan gou ou, an n monte....

O ! O ! Ou gen rezon, ban m fè mete chanpay ak kèk te, kafe, manje, pwason, chokola, sandwitch, lanbi griye, diri a djondjon , bouyon sa ou vle.

Michou — Mwen yon ti jan bouke, dòmi, m ta dòmi !

Nèg chare l - An An ! M konprann dòmi m ta dòmi tou...

— Toulede eklate ri anpi Nèg al kote Rozèt ak manman l, li fè kòmand manje ak bwason pou rès nwit ak matine an.

— Apre (15) kenz minit konsa, Nèg prèske pote Michou monte eskalye a pou l'al nan chanm li a ki te bay sou lari nan direksyon Sid kay la.

— Pandan se tan, tout pòt kay la gen tan fèmen, baryè kadnase, anpi yo tande (3) twa gason ap rele anba a. « Anmwey sekou, yo lage chen yo ! », ki se (2) de Dobèmann Simo ak Chimè, (2) de Bèje alman Mèt kalfou ak Makout epi (2) Danwa Santinèl ak Mache Pran Yo, sa sis (6) chen mechan k'ap gade lakou a ke Gwo Jera ak Bakoulou, sekirite kay la te fè gason yo lage chen yo pase yo konnen tout moun te fin ale... Non, Fouyapòt, Tripòt ak Lang Anmè te rete pou yo wè, si yo ta konn plis zen. Anben (6) sis gwo chen k pa manje anyen k frèt t'ap mande yo de ki prevyen nan Lakou Papi Jòj la, Tripòt ak Lang Anmè te tèlman pè ke yo kouri vit, yo bat rekò vole an wotè a paske yo vole mi an ki (3) twa mèt pou yo tonbe sou do yon machin nan lari a, yo manke kase kou yo men yo ale ak kèk ti blese de ryen ditou.

— Kant a Lang Anmè, wa di li te gen yon kout lang l'ap peye. Li blije kouri monte yon pye kayimit pandan lap rele Anmwey - Li vin tounen tankou yon ti makak k'ap vole de branch an branch, pou l'al sou pye kenèp la ki pi asire pandan l'ap kontinye rele anmwey, lapriyè Letènèl pou sove l, li lan ka, Pou l defann li, li deklare se nan twalèt li sòti li kontre ak chen yo ki pi sanble baka.

— Lè Lang Anmè rive sou tèt pye kenèp la, li pran yon souf paske li vin anfas chanm Nèg An Nou - Epi li rele Nèg ! Nèg ! Nèg An Nou, se mwen Lang dous, chen lakay ou yo bare m; m sèt oblije monte pyebwa yo, tanpri fè kenbe chen yo, konsa m ka desann male, dòmi nan zye m.

— Nèg An Nou, blije kite Michou li t'ap tripote, papòte depi (5) senk minit pou l al rele Rozèt ak Mikelon pou y'al kenbe chen yo... Lè yo kenbe chen yo, yo limen limyè a, moun nan katye a gen tan nan lari a ap fè legetè pou konn sa k pase... ansanm ak dezoutwa sitwayen ki te nan fèt la.

— Lang Anmè desann anpi yo konstate l te gen (3) twa mwayèn sache plastik mare nan ren l, plen manje, bwason, byè, kola, ronm... Rozèt ouvè baryè a pou li epi l di l: Lang Anmè, tripòt, vagabon, manyè sòti non; ou pa't konn te gen chen k'ap veye lakou a, alò pale kanmanrad ou yo, pou yo pa vin nwi moun la-a, lè tout fin ale lakay yo paske fèt la fini depi 3.4 dè detan.

Lang Anmè di — Mèsi Manzè Rozèt, ou pa bezwen pale se nan watè a m te ye, m t'ap degaje m paske m te yon ti jan manje twòp.

Rozèt — M konprann ou Lang Anmè se pou m te kite Simo, Chimè ak Mèt Kalfou devore bò dèyè ou, ou ta sispann pale tout madanm moun sou katye a mal... pase se sa w'ap mache fè, ou ta gen yon bagay pou ou fè, yon maleng pou ou okipe, ou pa ta tande ak wè pou ou mete pase genyen... yon lòt fwa wa konnen.

— Lè Lang Anmè fin sòti, li bay Rozèt siga...

— Rozèt pwomèt li pou l pran l yon jou konsa.

Apre ensidan sa, Rozèt ak sekirite yo rantre lakay, chen yo lage nan lakou a, yo tiye tout limyè anpi Michou al eseye fè dodo nan bra fiti Mari l.... ki t'ap chame l anpi nan lentimite total... Sa pa gade pèsonn ankò pa vre.

Propos recueillis par (Pawòl yo rapòte) N.T.




_________________
Richie est un grand musicien qui ne peut pas être compris du commun des mortels, car les notes qu'il émet sont trop élevées pour les oreilles du vulgaire.
 
View user's profile Send private message Send e-mail
Display posts from previous:   
This forum is locked: you cannot post, reply to, or edit topics.   This topic is locked: you cannot edit posts or make replies.    KOMPA! MAGAZINE Forum Index -> Sex All times are GMT - 5 Hours
Page 1 of 1

 
Jump to:  
You cannot post new topics in this forum
You cannot reply to topics in this forum
You cannot edit your posts in this forum
You cannot delete your posts in this forum
You cannot vote in polls in this forum
Geo Visitors Map